Cé Muid

COGG

Bunaíodh an Chomhairle um Oideachas Gaeltachta agus Gaelscolaíochta faoi fhorálacha Alt 31 den Acht Oideachais 1998 tar éis feachtais a chuir Comhdháil Náisiúnta na Gaeilge, Gaelscoileanna, agus Eagraíocht na Scoileanna Gaeltachta ar bun le go mbeadh sainstruchtúr ann le freastal a dhéanamh ar riachtanais oideachais na scoileanna Gaeltachta agus na scoileanna lán-Ghaeilge. Tá feidhmeanna maidir le múineadh na Gaeilge i scoileanna eile na tíre ag an gComhairle chomh maith.

Baineann ról na Comhairle leis an mbunoideachas agus leis an iar-bhunoideachas agus tá trí mhór-réimse oibre ann:

  • Soláthar acmhainní teagaisc
  • Seirbhísí taca
  • Taighde

Ceapadh comhaltaí Comhairle den chéad uair – tuismitheoirí, oidí agus saineolaithe eile- i mí Márta 2002. Ceapadh Príomhfheidhmeannach i 2002, Feidhmeannach Riaracháin i 2003 agus Cúntóir Taighde i 2005. Fógraíodh poist eile cúpla uair ó shin ach níor ceadaíodh iad líonadh. Ceapadh an dara bord i 2006 agus an tríú bord i 2010.

Dónal Ó hAiniféin – Cathaoirleach
Muireann Ní Mhóráin – Príomhfheidhmeannach

Ráiteas Misean

Cúraimí na Comhairle um Oideachas Gaeltachta agus Gaelscolaíochta a chomhlíonadh go héifeachtach, go gairmiúil agus ar ardchaighdeán ar mhaithe le forás na hearnála Gaeltachta agus lán-Ghaeilge a chur chun cinn agus ar mhaithe le múineadh na Gaeilge i scoileanna uile na tíre.

An Fhoireann

Muireann Ní Mhóráin
Ceapadh í ina Príomhfheidhmeannach ar an gComhairle um Oideachas Gaeltachta agus Gaelscolaíochta in 2002. Chaith sí tréimhse fada mar mhúinteoir Gaeilge agus mar mhúinteoir tacaíocht foghlama iar-bhunscoile agus í ag plé le forbairt churaclaim le linn an ama sin. Cigire athshannta is ea í.
Pól Ó Cainín
Ceapadh ina Chúntóir Taighde agus Foilseacháin é le COGG in 2005 tar éis 6 bliana a chaitheamh mar chúntóir taighde le hInstitiúid Teangeolaíochta Éireann. I ndiaidh dó céim dochtúireachta a bhaint amach in Ollscoil Uladh i 1994, bhí sé ina bhall de fhoireann Fhoclóir Gaeilge Béarla Collins Gem ar feadh sé mhí.
Máire Nic an Rí
Ceapadh í ina Oifigeach Oideachais le COGG in 2016. Múinteoir bunscoile í. Ghnóthaigh sí céim M.A sa Ghaeilge ó Ollscoil, Má Nuad. Tá sí ar iasacht ó Scoil Chéile Chríost, Ráth Mór, Co.Chill Dara. D’oibrigh sí mar Chomhairleoir Gaeilge leis an gClár Tacaíochta don Curaclam Bunscoile agus an tSeirbhís um Fhorbairt Ghairmiúil do Bhunscoileanna ó 2007-2010. D’oibrigh sí leis an tSFMG (PDST) ó 2011-2016 mar Chomhairleoir ar dtús agus ansin mar Cheannaire Foirne na Gaeilge (Bunscoil agus Iar-bhunscoil).
Pádraig Ó Beaglaoich
Ceapadh ina Oifigeach Oideachais Iar-bhunscoile é le COGG in 2016. I ndiaidh dó Ard-Dioplóma san Oideachas a bhaint amach sa bhliain 2011, chaith sé 5 bliana ag saothrú mar mhúinteoir iar-bhunscoile. Chaith sé seal roimhe sin ag obair mar shaoraistritheoir Gaeilge. Is díol  mór spéise dó forbairtí sa teicneolaíocht agus an tslí ar féidir iad a chur i bhfeidhm sa Ghaeilge. In 2016 bhain sé amach Dioplóma Gairmiúil sa Mhargaíocht agus Straitéis Dhigiteach.

Comhaltaí na Comhairle

Ceapadh comhaltaí reatha nua na Comhairle – tuistí, oidí agus saineolaithe eile, i gcomhair téarma oifige nua dar gcríoch Nollaig 2018. Is é ról na Comhairle ná forálacha Alt 31 den Acht Oideachais (1998) a fheidhmiú.

Ainm Sonraí
Dónal Ó hAiniféin Ainmní an Aire agus Cathaoirleach
Rita Nic Amhlaoibh An Chigireacht
Cathnia Ó Muircheartaigh Gaelscoileanna TEO.
Yvonne Ní Mhurchú Gaelscoileanna TEO.
Aodh Mac Craith Údarás na Gaeltachta
Daríona Nic Con Iomaire Udarás na Gaeltachta
Elaine Ní Neachtain CNCM
Sinéad Nic Giolla Cionnaigh Foras na Gaeilge
Deirbhile Nic Craith INTO
Robbie Cronin ASTI
Séamus Ó Fearraigh TUI
Seán Mac Nia Comhairle Churaclaim Scrúduithe agus Measúnaithe Thuaisceart Éireann

Miontuairiscí na gCruinnithe

Miontuairiscí COGG – 16 Iúil 2015
Miontuairiscí COGG – 6 Deireadh Fómhair 2015
Miontuairiscí COGG – 10 Samhain 2015
Miontuiariscí COGG – 19 Eanáir 2016
Miontuairiscí COGG – 19 Aibreán 2016
Miontuairiscí COGG – 14 Meitheamh 2016
Miontuairiscí COGG – 29 Meán Fómhair 2016

 

 

 


 

Córas Iniúchóireachta Inmheánach

Tá sé de bheartas ag An Chomhairle um Oideachas Gaeltachta & Gaelscolaíochta (COGG) córas iniúchóireachta inmheánach ar ardchaighdeán a bheith i bhfeidhm aici a thagann leis na cleachtais is fearr atá aitheanta chuige sin go reachtúil sa statchóras agus de réir treoracha na Roinne Airgeadais.

Cuirtear seirbhís iniúchóra inmheánaí ar fáil don Chomhairle um Oideachas Gaeltachta & Gaelscolaíocht ag cuntasóir cáilithe.

Is iad seo a leanas dualgais an iniúchóra inmheánaí:

  • Iniúchadh a dhéanamh ar bhonn rialta ar chuntais agus ar chleachtais agus ar chórais smachtaithe inmheánacha airgeadais COGG agus moltaí a chur ar fáil maidir lena leasú nó a fheabhsú nuair is gá.
  • Freastal ar an dá chruinniú in aghaidh na bliana den Choiste Iniúchóireachta COGG, tuairisc a chur faoi bhráid an Choiste agus ceisteanna ón gCoiste a fhreagairt maidir le cuntais agus cleachtais airgeadais COGG.

Sa chás go ndéanann An Chomhairle um Oideachas Gaeltachta & Gaelscolaíochta Ordú Ceannaigh de bhreis ar €20,000, foilseofar an t-eolas ar an suíomh seo

Cloíonn COGG leis an reachtaíocht faoi rochtain ar eolas faoin gcomhshaol agus na hAchtanna um Shaoráil Faisnéise. Is féidir leat ár Nós Imeachta agus Coimhlint Leasa a léamh.